Thursday, January 3, 2019

මිනිසෙකුගේ ඉරණම විසඳුන ඡායාරූපය

වියට්නාම් යුද්ධය හා සැබැඳි ඉතාමත් ප්‍රකට ඡායාරූපයක් වන්නේ පහත දැක්වෙන එකයි 


බැලූ බැල්මටම පෙනෙන පරිදි දකුණු වියට්නාම් ජෙනරල්වරයෙක්,  නිරායුධ හා දෙඅත් බැඳදමා සිටින සිරකරුවෙකුගේ ඔළුවට වෙඩි තබා ඔහුව ඝාතනය කරනවා. ඇමරිකානු මාධ්‍යවේදියෙක් නිපදවූ Hearts and Minds චිත්‍රපටයේ මෙම සිදුවීමේ වර්ණ වීඩියෝව දැකගන්නට පුලුවන්. මේ ඓතිහාසික ඡායාරූපය ගන්නේ ඇමරිකානු ඡායාරූප ශිල්පී එඩී ඇඩැම්ස් විසින් - ඒ සඳහා ඔහු පුලිට්සර් ත්‍යාගයෙන් පිදුම් ලබනවා. මේ ඡායාරූපය ඇමරිකානු තරුණ පරපුර පුරා පැතිරුනු යුද්ධ විරෝධි ව්‍යාපාරයේ සංකේතයක් වනවා. හැබැයි ඡායාරූප ශිල්පී එඩී ඇඩැම්ස් 1998 වසරේදී ටයිම් සඟරාවට මෙහෙම ලියනවා. 
" ජෙනරාල්වරයා වියට්කොං ගරිල්ලෙක්ව මරා දැම්මා. මම මගේ කැමරාවෙන් ජෙනරාල්වරයාව මරා දැම්මා. නිශ්චල ඡායාරූප තමයි ලෝකයේ බලගතුම ආයුධ. මිනිසුන් ඒවා විශ්වාස කරනවා - නමුත් අමුතුවෙන් හැසිරවීමෙන් තොරව පවා  ඡායාරූප ව්‍යාජයක් ගෙන එන්නට පුළුවන්" එඩී ඇඩැම්ස් තමන්ට කීර්තිය ගෙන ආ ඡායාරූපය ගැන මෙසේ   කිව්වේ ඇයි?  ඒය සෙවීමට අපට 1968 පෙබරවාරි මාසයේ දකුණු වියට්නාමයේ සයිගොන් (අද හෝ චි මිං නගරය) වෙත යාමට සිදුවනවා. 

1968 වියට්නාම් ජාතිකයන්ගේ නව වසර එනම් ටෙට් උත්සව සමයේ එකවනම වියට්කොං ගරිල්ලන් ප්‍රබල ප්‍රහාරයක් එල්ල කරනවා. උතුරු වියට්නාම් හමුදා සහායද සහිතව එල්ල කරන මේ පහර දීමට 80,000ක පමණ බල ඇණියක් සහභාගි වූ සඳහන්. මෙම ප්‍රහාරයට වියට්කොං වරු සූදානම් වන්නේ රහසේ. ප්‍රහාරයේ අරමුණ සතුරා විමතියට පත් කිරීමයි. හමුදා ඇඳුම් වෙනුවට සිවිල් ඇඳුමෙන් සැරසුනු ගරිල්ලන් දකුණු වියට්නාමයේ පාලන තන්ත්‍රයට සම්බන්ධ සාමාන්‍ය ජනතාව හා ඔවුන්ගේ පවුල්වල අයට පවා ප්‍රහාර එල්ල කිරීමට පසුබට වන්නේ නැහැ. ඇමරිකානු තානාපතිි කාර්යාලයට ප්‍රහාර එල්ල කිරීමට තරම් ටෙට් ආක්‍රමණය බිහිසුණු වනවා. මේ ප්‍රහාරක කණ්ඩායමේ සිටි එක් වියට්කොං කපිතාන් වරයෙක් වූයේ ගුවෙන් වන් ලේම්. සිවිල් ඇඳුමින් සැරසී සිටි ගුවෙන් විසින්  දකුණු වියට්නාම් හමුදාවේ ලුතිනන් කර්නල් ගුවෙන් තුවාන්, ඔහුගේ බිරිඳ, 80 හැවිරිදි මව සහ ඔවුන්ගේ දරුවන් සයදෙනා අමානුෂික ලෙස ඝාතනය කරන්නේ ගෙල සිඳ දැමීමෙන්.  ඔහුව අත්අඩංගුවට පත්වූ පසු මෙතනට පැමිණෙන දකුණු වියට්නාම් හමුදාවේ දක්ෂතම ජෙනරල්වරයෙක් වන ගුවෙන්  ඥක් ලුවන් මේ අපරාධය දැක එකවනම ගුවෙන් වන් ලේම්ගේ හිසට පිස්තෝලයකින් වෙඩි තබා ඝාතනය කරනවා. එඩී ඇඩැම්ස් කැමරා කාචයේ සටහන් කරගත්තේ එම අවස්ථාවයි. 

කෙසේ වෙතත් ඉන්පසුවත්  ජනරල්වරයා දැඩිව සටන් බිමේ ක්‍රියාන්විතයන්ට දායක වනවා. එක් අවස්ථාවකදී ඔහුගේ පාදයට බරපතල තුවාල පවා සිදුවන්නේ මැෂින් තුවක්කු ප්‍රහාරයකින්. ඒ අවස්ථාවේ ඔහුව බේරා ගන්නේ ඕස්ට්‍රේලියානු මාධ්‍යවේදියෙක් - කෙසේ වුවත් 1975 දී සයිගොන් නගරය යටත් වීමත් සමඟ ජෙනරල් ලුවන් ඇමරිකාවේ වර්ජිනියාවට සංක්‍රමණය වනවා. ඔහු එහි පීට්සා අවන්හලක් පවත්වා ගෙන යනවා. එසේ වුවත් එඩී ඇඩැම්ස්ගේ ඡායාරූපයේ ඉන්නේ ඔහු බව මාධ්‍යවේදීන් අනාවරණය කිරීම නිසා ලුවන් හට තම ව්‍යාපාරය නිදහසේ කරගෙන යන්න ලැබෙන්නේ නැහැ. ඔහු හට විවිධ පිරිස්වලින් අතවර සිදුවනවා. මේ අතර ඇමරිකානු කොංග්‍රසයෙන් යුද්ධ අපරාධ නිසා ඔහුගේ පුරවැසි බව අහෝසි කොට ආපසු වියට්නාමයට පිටුවාහල් කිරීමට සැරසුනත් ජනාධිපති ජිමී කාටර් මැදිහත්  වී එය නවත්වනවා. 


මේ අතර එඩී ඇඩැම්ස් ද ලුවන්ගේ පීට්සා අවන්හලට පැමිණෙවා. ඔහු පත්වී ඇති තත්ත්වය ගැනත් එයට වගකිව යුත්තේ තමා නිසාත් ඇඩැම්ස් පශ්චාත්තාපයට පත්වූ බව පැවසෙනවා. අවසානයේ විවිධ තර්ජන මධ්‍යයේ පීට්සා අවන්හල වසා දමන ලුවන් 1998 වසරේදී පිළිකා රෝගයෙන් මිය යනවා. ඔහුව අනුස්මරණය කරමින් ටයිම් සඟරාවට ලියන්නේ එඩී ඇඩැම්ස් ඉහත වදන් යොදා ගනිමින්. 

Tuesday, December 18, 2018

බුකියෙන් ගැලවෙන්නේ කෙසේද? Facebook Addiction








සාමාන්‍යයෙන් බුකිය කිව්ව විට අපට කලින් පරම්පරාවන්ට නම් මතකයට එන්නේ රේස් බුකිය විය යුතුයි. එංගලන්තයේ අශ්ව රේස්වලට ලංකාවේ ඇති රේස් බුකි හරහා ඔට්ටු දැමීමට අබ්බැහි වීම නිසා තම ධනය, දේපළ අහිමි කරගත් අය ගැන අපට එකල අසන්නට ලැබුනා. ජනප්‍රිය ගීත පවා මේ ගැන බිහිවී තිබීම එම කාර්යයයේ සමාජ බලපෑම ගැන හොඳ මිම්මක්. කෙසේ වුවත් වර්තමාන පරපුර "බුකිය" ලෙස හඳුන්වන ෆේස්බුක් වෙබ් අඩවියද එවැනිම වූ අබ්බැහි වන සුළු ස්වභාවයක් ආකාරයක් ගන්නා බවට ඔබ වැඩි දෙනෙක් එකඟ වනවා ඇති. 

පසුගිය කාලයේ පුද්ගලිකත්වයට සම්බන්ධ විවිධ හේතූන් මත ෆේස්බුක් සමාගම විශාල විවේචනයකට භාජනය වුනා වගේම විශාල පිරිසක් බුකියෙන් ඉවත් වීමද දක්නට ලැබුනා. කෙසේ වුවත් ලංකාවේ දැනුවත්ව තවමත් එවැනි ප්‍රවණතාවයක් විශාල පරිමාණයෙන් දක්නට ලැබෙන්නේ නැහැ. ‍ මෑතක සිට ෆේස්බුක් අඩවිය මඟින් අදාළ පරිශීලකයා එම අඩවියේ ගත කරන කාලය මැනීම‍ට අවස්ථාව උදාකර දී තිබෙනවා. ඒ අනුව මා නිරීක්ෂණය කළේ දළ වශයෙන් පැය 2ක‍ට ආසන්න කාලයක් බුකියේ මා ගත කරන බවයි. මෙය විශාල කාල නාස්තියක් බව අමුතුවෙන් කිව යුතු නැහැ. 

සැබවින්ම මෙලෙස අබ්බැහි වන්නේ ඇයි? ප්‍රධානම හේතුව වන්නේ විවිධ දෑ ගැන මගේ අදහස් අනෙකුන් හා බෙදා ගැනීමත් ඒ වටා බැඳුනු සංවාදත් නිසා ලැබෙන නාසිස්මය ආශ්වාදයි. සැබෑ ලෝකයේ මා ප්‍රිය කරන කරුණු ගැන කතා කිරීමට මිතුරෙක් හෝ අැත්තේම නැති තරම් (සිටි එකම පුද්ගලයා වූ මගේ පියාද දැනට ජීවිතුන් අතර නැහැ) එමෙන්ම එවැනි මාතෘකා කතා කිරීම සැබෑ ලෝකයේ මිතුරන්ට ඉතාම නීරස වනවාත් විය හැකියි. එම නිසාම අතත්‍ය  ලෝකයේ එවැනි අදහස්වලට යම් පිළිගැනීමක් ලැබීම බුකියට අබ්බැහි වීම තීව්‍ර කරන කරුණක්. එමෙන්ම බුකිය ඔස්සේ මා ප්‍රිය කරන ආගම, දර්ශනය, දේශපාලනය වැනි මාතෘකා සම්බන්ධයෙන් අලුත් කරුණු දැනගැනීමට ලැබීම, සංවාද කරන්නට ලැබීමත් මීට සම්බන්ධයි. කෙසේ වුවත් සැබෑ ලෝකයේ ඇතැම් මූලික වගකීම් පැහැර හැරීමටද මේ අබ්බැහිය හේතු කාරක වන බව මට වැටහුනේ වරක් දෙවරක් නොවේ. 

එබැවින් බුකියෙන් සම්පූර්ණයෙන් මිදීම කෙසේ වෙතත් යම් ප්‍රමාණයකට සීමා කිරීමට පියවර කිහිපයක් ගැනීමට තීරණය කළා. බුකි ගිණුම සම්පූර්ණයෙන් මකා දැමීම අපහසුයි. මන්ද නිරතුරු මුණ නොගැසෙන මගේ පුද්ගලික මිතුරන් මෙන්ම ඥාතීන් යම් ප්‍රමාණයක් ද එමෙන්ම විවිධ කරුණු සම්බන්ධයෙන් වටිනාකමක් අැති  ගිණුම් එහි තිබීමයි. එම නිසා තීරණය කළේ බුකියේ ජනප්‍රියම ගිණුම් කිහිපයක් අන්ෆලෝ කිරීමටයි. එසේ කරන ලද්දේ එම පුද්ගලයන් සමඟ කිසිඳු ප්‍රශ්නයක් නිසා නොව ඔවුන්ගේ දෛනික ලියවිලි දකින විට බුකියේ ගතකරන කාලය වැඩි වන නිසායි. මීට අමතරව විදේශීය පුවත් අඩවි විශාල ප්‍රමාණයක්ද අන්ෆලෝ කළෙමි. ඊළඟ පියවර වූයේ තාවකාලිකව ගිණුම අක්‍රිය කිරීමයි.  දැන්ම අනාවැකි කීම අපහසු වෙතත් බුකි ඇබ්බැහියෙන් යම් සහනයක් මේ පියවර නිසා ලැබේයැයි සිතනවා. හැබැයි තව සතියක් යන්නට පළමු නැවතත් බුකියේ පෙර පරිදිම ක්‍රියාකාරි වුවහොත් එයද අරුමයක් නොවනු ඇති.  

Thursday, December 13, 2018

ජනාධිපතිට ජනමතවිචාරණයක් පැවැත්විය හැකිද?





ජනාධිපතිතුමාට ඕනෑම ජාතික වැදගත්කමක් ඇති කරුණක් ගැන ජනමතවිචාරණයක් පැවත්වීම ගැන  දැක්වෙන්නේ ආණ්ඩු ක්‍රම ව්‍යවස්ථාවේ XIII වැනි පරිච්ඡේද‍යේ 86 වැනි ව්‍යවස්ථාව යටතේයි. එනම් -  

The President may, subject to the provisions of Article 85, submit to the People by Referendum any matter which in the opinion of the President is of national importance.

මෙතැන වැදගත් කරුණ නම් ජනමතවිචාරනය පැවැත්විය යුත්තේ 85 වැනි ව්‍යවස්ථාවේ විධිවිධානවලට යටත්ව බවයි. දැන් 85 වැනි ව්‍යවස්ථාවේ සඳහන් වන්නේ කුමක්දැයි බලමු - එය වගන්ති 2 කින් යුතුය (එක් වගන්තියක් 19 වැනි සංශෝධනයෙන් ඉවත් කර ඇත)

85. (1) The President shall submit to the People by Referendum every Bill or any provision in any Bill    which  the Cabinet of Ministers has certified as being intended to be submitted to the People by Referendum, or which the Supreme  Court has determined as requiring the approval of the People at a Referendum if the number of votes cast in favour of such Bill amounts to not less than two-thirds of the whole number of Members (including those not present).
 (3) Any Bill or any provision in any Bill submitted to the People by Referendum shall be deemed to be approved by the People if approved by an absolute majority of the valid votes cast at such Referendum : Provided that when the total number of valid votes cast does not exceed two-thirds of the whole number of electors entered in the register of electors, such Bill shall be deemed to be approved only if approved by not less than one-third of the whole number of such electors.

මෙහි 85(1) සඳහන් වන්නේ කුමක්ද? ජනාධිපතිවරයාට අනුව ජාතික වැදගත්කමක් ඇති යෝජනාවක් වුවද එය ජනමතවිචාරණයක් සඳහා ඉදිරිපත් කිරීමට පෙර  අමාත්‍ය මණ්ඩලයේ අනුමැතිය ලැබුනු පසුවද පාර්ලිමේන්තුවේ සියළු මන්ත්‍රීවරුන්ගේ (නොපැමිණි අයද සමඟ) 2/3 ක බහුතරයක් ලබා ගත් යුතුය

අනිත් වචනවලින් කිවහොත් වර්තමාන ජනාධිපති ‍මෛත්‍රීපාල සිරිසේනට ජනමතවිචාරණයක් වෙත යාමේ හැකියාවක් නොමැත


Tuesday, August 29, 2017

සර් රොජර් කේස්මන්ට්: අධිරාජ්‍යයේ වීරයෙකුගේ සිට ද්‍රෝහියෙකු හා සමාජ දූෂකයෙකු දක්වා Sir Roger Casement : from Imperial Hero to Traitor and the Sexual Deviant

අප කවුරුත් දන්නා පරිදි වර්තමාන කොංගෝව කලක් බෙල්ජියමේ ලියෝපෝල්ඩ් රජුගේ පුද්ගලික භාර‍යේ පැවතුනා. එකල බෙල්ජියන් කොංගෝවේ ස්වදේශීය ජනතාව මුහුණ දුන් බිහිසුණු හා දුඛිත තත්ත්වය ලොවට අනාවරණය කිරීම සඳහා විශාල මෙහෙයක් කළ පුද්ගලයෙක් වන්නේ එවක බ්‍රිතාන්‍ය විදේශ සේවයේ උසස් නිලධාරියෙක් වූ රොජර් කේස්මන්ට්. මේ හැරුණු විට කේස්මන්ට් කළ තවත් වැදගත් මෙහෙවරක් වූයේ පීරු රජයට අයත් රබර් සමාගමේ නිලධාරීන් විසින් ඇමේසන් වනාන්තරයේ ඈත පෙදෙස්වල කරන රබර් වගාව සඳහා ස්වදේශීය ජනතාව වහල් මෙහෙයට යොදා ගැනීම, ඔවුන් වධ බන්ධන වලට ලක්කිරීම ගැන වාර්තාවක් පළ කිරීමයි. මෙලෙස ස්වදේශීය ජනතාව වෙනුවෙන් කළ මානව හිතවාදී සේවය වෙනුවෙන් ඔහු නයිට් පදවියකිනුත් පුද ලබනවා. එහෙත් ඔහු ජීවිතය අවසන් කරන්නේ රාජද්‍රෝහියෙකු ලෙසයි. එපමණක් නොව නඩු විභාගයේදී හෙළිවූ ඔහුගේ රහස් දිනපොත් නිසා කේස්මන්ට්  පිළිගත් ලිංගික ආචාර ධර්ම බිඳහෙලූ අපචාරී සමාජ දූෂකයෙකු ලෙස මරණයෙන් පසුව අද දක්වාම දැඩි  විවාදයට ලක්වනවා. 

විදේශ සේවය 
රොජර් ‍කේස්මන්ට් උපත ලබන්නේ 1864 දී අයර්ලන්ත‍යේ ප්‍රොතෙස්තන්ත ක්‍රිස්තියානි පවුලක. ඔහුගේ මව  එරට බහුතරයක් මෙන්ම කතෝලික කාන්තාවක්. ළමා වියේදීම සිය දෙමාපියන් මියයාම නිසා කේස්මන්ට් හැදී වැ‍ඩෙන්නේ නැන්දණියක ළඟයි. තරුණ වියේම වාණිජ නාවික සේවයටද පසුව රේගු නිලධාරියෙක් ලෙසද සේවය කරන කේස්මන්ට් අවසානයේදී බ්‍රිතාන්‍ය යටත් විජිත සේවයට පත්වෙන්නේ එරට විදේශ අමාත්‍යාංශය යටතේ. විදේශ සේවයේ නිලධාරියෙකු ලෙස ආසියාවේ හා අප්‍රිකාවේ රටවල් රැසක ඔහු සේවය කරනවා. මේ අතර බෙල්ජියමේ ලියෝපෝල්ඩ් රජු විසින් "සමාජ සේවය" සඳහා වූ සමාගමක් මඟින් පාලනය කරන දැවැන්ත කොංගෝ රාජ්‍යයේ ස්වදේශිකයන් මුහුණ දෙන සූරාකෑම ගැන විවිධ තොරතුරු බ්‍රිතාන්‍ය රජයට ලැබෙනවා. 

මෙම තොරතුරුවල සත්‍යසත්‍යභාවය සොයා වාර්තාවක් සැපයීමේ වගකීම  විදේශ අමාත්‍යාංශය  පවරන්නේ කේස්මන්ට් හටයි. කේස්මන්ට් කොංගෝවට පැමිණීමෙන් පසු අධිරාජ්‍යවාදය හා සූරාකෑම ගැනත්, එතුළ ශිෂ්ඨ යැයි සම්මත මිනිසුන් වනාචාරීන් බවට පත්විමත් විදහා දක්වන කෙටි නවකතාවක් වන Heart of Darkness ලියූ ජෝසෆ්  කොන්රඩ්වද හමුවනවා. කොංගෝවේ ස්වදේශිකයන්ගේ තත්ත්වය ගැන දීර්ඝ අධ්‍යයනයක් කරන කේස්මන්ට් ඉන් කම්පාවට පත්වනවා. පසුව එළිදක්වන ඔහුගේ වාර්තාවේ බෙල්ජියානු පාලනය හා එහි  සේවකයන් විසින් කොංගෝ ස්වදේශිකයන් සූරා කන අන්දමත් ඔවුන් ම්ලේච්ඡ වධ බන්ධන වලට ලක් කරන අන්දමත් පැහැදිලිව සඳහන් වනවා. මේ වාර්තාව යුරෝපය පුරා දැඩි ආන්දෝලනයකට හේතු වන අතර ඒ නිසාම කොංගෝව බෙල්ජියන් රජුගේ පාලනයෙන් ඉවත් කොට  තම පාලනයට ලක් කිරීමට බෙල්ජියන් රජයට සිදුවනවා. මේ නිසා කොංගෝ ස්වදේශික ජනයාගේ ජීවිත වඩාත් යහපත් වූ බව සත්‍යයක්. මේ නිසා කේස්මන්ට් හට මානව හිතවාදියෙක් ලෙස විශාල ප්‍රසිද්ධියක් ලබනවා. 
ඉන්පසු ඔහු තවත් කාර්යයකට අතගසනවා. පීරු රජය විසින් ඇමේසන් වනාන්තරයේ ගැඹුරේ පුටෙමායෝ ප්‍රදේශයේ රබර් වගාව සිදුකරන්නේ රාජ්‍ය සමාගමක් මාර්ගයෙන්. මේ සමාගම විසින් ඒ ප්‍රදේශවල ජීවත්වන ස්වදේශික ජනතාව වහලුන් ලෙස රබර් වගාව සඳහා යොදාගන්නා බව ආරංචි වන කේස්මන්ට් ඒ ගැන සොයා බැලීමට පීරු රටට යන්නේ 1911 දී පමණ. පූර්ණ විමර්ශනයකින් පසු ඔහු එළි දක්වන වාර්තාවේ සඳහන් වන්නේ අසරණ ස්වදේශික ජනයා පවුල් පිටින් කෲර වද හිංසා වලට ලක්වන බවත් ඔවුන් සාගතයෙන් පෙලෙමින් වහලුන් ලෙස රබර් වතුවල වැඩට බලයෙන් යොදා ගන්නා බවත්. මේ වාර්තාවත් විශාල ආන්දෝලනයක් ඇති කිරීමට සමත් වුනා. පීරු රටේ රබර් සමාගම සමඟ ගනුදෙනු කිරීමට යුරෝපීය සමාගම් අධෛර්යමත් කිරීමට එම වාර්තාව සමත් වුනා කීවොත් නිවැරදියි. 

මෙම වාර්තාව නිසා හා කලින් කොංගෝ වාර්තාව නිසා, සූරාකෑමට ලක්වූ ස්වදේශීය ජනතාව වෙනුවෙන් කතා කරන මානව හිතවාදියෙක් ලෙස විශාල ප්‍රසිද්ධියක් කේස්මන්ට් ලබනවා. බ්‍රිතාන්‍යයේ පස්වන ජෝජ් රජු ඔහුට නයිට් පදවිය පිරි නමනවා. බ්‍රිතාන්‍ය ඉහළ පැලැන්තියේ මෙන්ම සාමාන්‍ය ජනතාවගේද වීරයෙකු වන කේස්මන්ට් පසුව විදේශ  සේවයෙන් විශ්‍රාම ලබනවා. 
පුටෙමායෝහිදී ස්වදේශීය පිරිමි ළමුන් සමඟ 

අයිරිෂ් ජාතිකවාදය 

කේස්මන්ට් සිය ගැටවර වියේ සිටම අයිරිෂ් ජාතිකවාදයට ඇල්මක් දැක්වුවත් සිය ගමන්වලදී ස්වදේශීක ජනයා අධිරාජ්‍යවාදී සූරාකෑමට ලක්වන අයුරු දැකීම නිසාම කෙමෙන් රැඩිකල් අයර්ලන්ත ජාතිකවාදියෙක් බවට පත්වනවා. කලක් අධිරාජ්‍යයේ නියෝජිතයෙක්ව සිටි කේස්මන්ට් මෙලෙස අංශක 180 ක් අනික් පසට හැරෙනවා. 1913 දී විදේශ සේවයෙන් විශ්‍රාම ගැනීමෙන් පසු ඔහු ගේ කාලය ධනය හා ශ්‍රමය වැයවන්නේ අයර්ලන්තය බ්‍රිතාන්‍ය අධිරාජ්‍යයෙන් නිදහස් කරගැනීමේ අරගලය උදෙසා. මේ වන විට පළමු ලෝක සංග්‍රාමය ඇරඹී තිබුනා. බ්‍රිතාන්‍යට විරුද්ධ පාර්ශ්වයේ සිටි ජර්මනියෙන් අයර්ලන්ත නිදහස් අරගලයට ආධාර උපකාර ලබා ගැනීම සඳහා ඔහු රහසේම ජර්මනියට  ගොස් වසර 2ක් එහි ගත කරනවා. එසේ වුවත් සිතූ තරම් ආධාර නොලැබෙන බව දක්නට ලැබෙනවා. 

අවසානයේ 1916 දී ඔහු නැවත අයර්ලන්තයට පැමිණෙන්නේ ජර්මන් සබ්මැරයිනයක් ආධාරයෙන්. කෙසේ වුවත් කේස්මන්ට්ගේ ජර්මානු සබඳතා ගැන මේ වන විට බ්‍රිතාන්‍ය රහස් ඔත්තු සේවා හට ඉව වැටී තිබුනා. මේ නිසා අයර්ලන්තයට නැවත පැමිනි වහාම ඔහු බ්‍රිතාන්‍ය අත් අඩංගුවට පත්වනවා. මේ අතර කේස්මන්ට්ගේ අනුදැනුමකින් තොරව 1916 පාස්කු දින අයර්ලන්ත ජනරජවාදීන් බ්‍රිතාන්‍යට එරෙහිව දැවැන්ත කැරැල්ලක් දියත් කරනවා. කැරැල්ල දින කිහිපයකදි මැඩ පවත්වන  බ්‍රිතාන්‍ය රාජද්‍රෝහී චෝදනා මත එම කැරැල්ලේ නායකයන් මරා දැමීමට තීරණය කරනවා. කලක් බ්‍රිතාන්‍ය අධිරාජ්‍යයේ වීරයෙක් වූ කේස්මන්ට් හටද එම චෝදනාව එල්ල වනවා. තවද ඔහුගේ නයිට් පදවියද ඉවත් කරනු ලබනවා. 

කාල දිනපොත් Black Diaries 

කේස්මන්ට් ට විරුද්ධ නඩු විභාලය අතර තුර ඔහුගේ බඩු බාහිරාදිය අතර තිබී ස්කොට්ලන්ඩ් යාඩ් පොලිසියට හමුවන්නේ ඔහුගේ රහස් දිනපොත් සමූහයක්. තම විවිධ ගමන්වලදී හමුවන පිරිමි ළමුන් සමඟ ලිංගික සම්බන්ධතා පැවැත්වූ ආකාරය හා එම ලිංගික ක්‍රියාවන්ද ඉතාම පැහැදිලි විස්තර සහිතව ඒ දිනපොත්වල වාර්තා වනවා. මේ දිනපොත්වලින්  තෝරාගත් කොටස් මාධ්‍යවලට නිකුත් වීම නිසා මානව හිතවාදියෙක් ලෙස කේස්මන්ට්ගේ තිබූ ප්‍රතිරූපය පළුඳුවී ඔහු සමාජ දූෂකයෙක් හා ලිංගික විකෘතිකාමියෙක් ලෙස සැලකීමට ලක්වනවා. 

මෙම දිනපොත් බ්‍රිතාන්‍ය රජය විසින් කරන ලද කූට  ලේඛන බවට  චෝදනා කේස්මන්ට්ගේ මරණයෙන් පසුද වසර 100 ක් පමණ ගත වන තෙක් පැවතුනා. කෙසේ වුවත් ඉතා මෑතදී කරන ලද පරීක්ෂණවලින් හෙළිවී ඇත්තේ එම දිනපොත් කේස්මන්ට් විසින්ම ලියන ලද ඒවා බවයි. 

මරණය

තම ප්‍රතිරූපය හානිවීමට ලක්ව රාජද්‍රෝහියෙක් ලෙස  චෝදනාවට ලක්වූ රොජර් කේස්මන්ට් බ්‍රිතාන්‍ය රජය විසින් එල්ලා මරා දමනු ලැබුවා. අවසානය දක්වාම ඔහු නිර්භීතව මරණයට මුහුණ දුන් බව පැවසෙනවා. 
කේස්මන්ට්ගේ මරණය වාර්තා වූ අයුරු 

කෙසේ වුවත් රොජර් කේස්මන්ට්ගේ සමකාමී හැසිරීම නිසා සාම්ප්‍රදායික කතෝලික සමාජයක් ඇති අයර්ලන්තයේ  ඔහු හට ජාතික වීරයෙක් ලෙස පිළිගැනීම මෑතක් වන තුරුම නිසි පරිදිි නොලැබුනු බව සත්‍යයක්. 


Sunday, August 27, 2017

කළු හිස්වැසුමක් ලූ කළු හැදගත් මිනිසාගේ අභිරහස The Mystery of the Black Hat Man

මම සාමාන්‍යයෙන් අද්භූත, තාර්කිකව පැහැදිලි කළ නොහැකි දේ ගැන එතරම් සැලකිල්ලක් දක්වන අයෙකු නොවේ. කෙසේ වුවත් මා මේ  සිදුවීම සඳහන් කරන්නේ  ඉතාම පුද්ගලික මට්ටමෙන් මට සමීප වීමත් ඉන්පසුව ඒ ගැන යම් යම් අවස්ථාවල අසන්නට ලැබීමත් නිසා. 

2015 ජූනි මාසය වන විට ඒ වන විට රෝගාතුරව සිටි මගේ පියාගේ සෞඛ්‍ය තත්ත්වය තරමක් අයහපත් වුනා. එසේ වුවත් ඊට මාස 4කට පෙර රෝගී වීමට පෙර මනා සෞඛ්‍ය තත්ත්වයෙන් සිටි නිසාත් සාමාන්‍යයෙන් ඇඳට සීමාවූ වැනි තත්ත්වයක් නොමැති නිසාත් ඔහුගේ රෝගයේ සුව අතට හැරීමක් කෙසේවුවත් යම් ස්ථාවර වීමක් අපි බලාපොරොත්තු වූවා. ඇත්තෙන්ම ඒ වන විටත් ඔහු තරමක් අපහසුවෙන් වුවත්  සාමාන්‍ය එදිනෙදා  වැඩ කටයුතු කරගනිමින් දවස ගත කළා. මේ අතර දිනක් මට දුරකථනයෙන් ඇමතූ ඔහු තරමක බියකින් සඳහන් කළේ නාන කාමරයට ගිය විට කළු හැඳගත් කළු ඇඳුමක් හැඳි පුද්ගලයෙකු දුටු බවයි. මේ කතාව කිහිප විටක්ම මා සමඟ පැවසුවා. මගේ හැඟීම වූයේ රෝගී තත්ත්වය නිසාම ඔහු දකින කිසියම් දෘෂ්ඨි මායාවක් විය හැකි බවයි. ඒ බව පැවසූ මම ඒ ගැන නොසිතන ලෙසත් ඉක්මණින්ම රෝගී තත්ත්වය යහපත් බවට හැරෙනු ඇති බවත් සඳහන් කළා. එහෙත් මේ සිදුවීම්වලින් මසකට පසු ඔහු අප අතරින් වියෝවූයේ හදිසියේම කෝමා තත්ත්වයකට පත්වීමෙන්.තාත්තාගේ මරණයෙන් පසු මගේ බිරිඳ එතෙක් නොකිවූ යමක් මා සමඟ පැවසුවා. එනම් ඇගේ හොඳම මිතුරියගේ පියාද මිය යාමට කලින් සතිවල මෙවැනිම කළු හිස්වැස්මක් පැළඳු පුද්ගලයෙක් දකින බව පැවසූ බවයි. තාත්තා මේ කරුණම පවසන විට ඇය පෙර සිදුවීම නොපැවසූයේ පැහැදිලි හේතූන් මතයි. 

කෙමෙන්  මේ කරුණ මගේ මතකයෙන් ගිලිහී ගියත් යළිත් මතකයට ආවේ සති දෙකකට පෙර වූ සිදුවීමක් නිසයි. කාර්යාලයේ මගේ මිතුරෙකු පැවසූයේ තම පියා රෝගාතුරවී ඉන්නා බවත් කළු තොප්පියක් පැළඳි  මිනිසෙක් ගැන විටින් විට පවසන බවත්. මා ඒ  ගැන නිහඩ වුවත් එම සති අන්තයෙන් පසු කාර්යාලයට පැමිණි විට දැන ගන්නට ලැබුනේ පෙර දින එම පියා අභාවප්‍රාප්ත වූ බවයි. 

මරණයට පෙර දකින මේ කළු හිස්වැසුම් ලූ කළු හැඳගත් මිනිසා ගැන මා හට අවසාන නිගමනයක් නැහැ. බොහෝ දුරට මරණය ළඟා වන විට මොළයේ යම් ක්‍රියාකාරිත්වයක් නිසා දකින දෘෂ්ඨි මායාවක් විය හැකියි. ආගමික විශ්වාසයන් අනුව ඒ මාරයා විය හැකියි. 

Saturday, July 22, 2017

ඔබට Other Side of Midnight මතකද ?  Can you remember Other side of Midnight ?

ඉහත ප්‍රශ්නය නැගුවොත්  සිඩ්නි ෂෙල්ඩන්ගේ එනම් ජනප්‍රිය නවකතාව මතකයට නැගෙනු ඇති.  අනපේක්ෂිත අවසානයක් (plot twist) තිබීම එම නවකතාව මතකයේ රැඳීමට ප්‍රධාන හේතුවක්. වරක් (සන්ඩේ ටයිම්ස් කතෘ) සිංහ රත්නතුංග, එස් බී දිසානායක මහතාව සිරගෙට යැවීමට හේතුවූ නඩු තීන්දුව හැඳින්වූයේ අදර් සයිඩ් ඔෆ් මිඩ්නයිට් සිදුවීමක් ලෙසයි. එනම් අධිකරණයේ එවකට ප්‍රබලයෙක් ඒ මහතාට වරද පිළිගත්තොත් නිදහස් කරන බවට  පොරොන්දුවක් දී නොමඟ යවා ඔහුව සිරගෙට යැවීමට (හඟවා ඇති පරිදි එවක ජනපතිනියගේ අනුදැනුම ඇතුව) කටයුතු කළ බවයි. එලෙස නවකතාව ඔබේ මතකයේ රැඳුනත්  නවකතාව ඇසුරින් නිර්මාණය කොට ඇති චිත්‍රපටයක් ගැන නම් ඔබ අසා තිබීමේ සම්භාවිතාව අඩු බව බොහෝ දුරට ස්ථිරයි. මෙවැනි ජනප්‍රිය නවකතාවක්  ඇසුරින් විශාල මුදලක් හා අන්තර්ජාතික මට්ටමේ නළුනිළියන් පිරිසක් යොදවා නිර්මාණය කළ චිත්‍රපටයක් අපේ මතකයේ නොරැඳීම පිටුපස ද රසවත් හේතුවක් තිබෙනවා. 

සිඩ්නි ෂෙල්ඩන්ගේ Other side of Midnight නවකතාව ප්‍රකාශයට පත්වන්නේ 1973 වසරේදීයි. පෙම් ත්‍රිකෝනයක් ඇසුරු කරගත් නවකතාවක් වූ එය අතිශයින් ජනප්‍රිය වීම නිසාම ට්වෙන්ටියත් සෙන්චරි ෆොක්ස් සමාගම එහි අයිතිවාසිකම් මිලදී ගත්තේ චිත්‍රපටයක් නිර්මාණය කිරීමටයි. ජනප්‍රිය වට්ටෝරු මාදිලියේ චිත්‍රපටයක් සඳහා සියලු අමුද්‍රව්‍ය එනම් පෙම් කතාවන්, ලිංගිකත්වය, අනපේක්ෂිත අවසානයක් ආදි  සියලු දේ    නවකතාව සතුවුනා. මේ නිසාම ඊට කලින් ගෝඩ් ෆාදර්, එක්සෝසිස්ට් වැනි ජනප්‍රිය නවකතා ඇසුරින් තනන ලද ඉහළ මට්ටමේ හොලිවුඩ් චිත්‍රපට මෙන්ම මෙය ජනප්‍රිය වීමේ වැඩි සම්භාවිතාවක් තිබුනා. 

අන්තර්ජාතික මට්ටමේ නළු නිළි පිරිසකුත් සමඟ විශාල වියදමක් දරා නිපයූ Other Side of Midnight චිත්‍රපටය 1977 නිකුත් කිරීමට  ට්වෙන්ටියත් සෙන්චරි ෆොක්ස්  සූදානම් වුනා. පෙර ප්‍රචාරණය නිසා මේ චිත්‍රපටය ගැන සිනමාහල් අයිතිකරුවන් අතර විශාල උනන්දුවක් ඇති වී නිසැකවම ලොකු ගාණක් හොයා ගත හැකි මේ චිත්‍රපටය තම සිනමා හල් වෙත ලබා ගැනීමේ උනන්දුවක් තිබුනා. හැබැයි සෙන්චරි ෆොක්ස් සමාගමට මේ වෙන කොට තවත් ගැටළුවක් තිබුනා. 

නාහෙට අහන්නෙ නැති දඩබ්බර කොළු ගැටයෙක් අධ්‍යක්ෂණය කරපු වැඩිය අහල නැති නවක නළු නිළි පිරිසක් රඟපාන ටිකක් නෙවේ හොඳටම විකාරරූපි කතාවක් තියන "බී' ග්‍රේඩ් විද්‍යා ප්‍රබන්ධ චිත්‍රපටයකුත් මේ කාලයේම නිකුත් කිරීමට සමාගම සැලසුම් කර තිබුනා. අද්භූත සත්ත්වයන්, 1930 දශකයේ කව්බෝයි ෆිල්ම් හා සුපර් හීරෝ ෆිල්ම්වල කොටස් මිශ්‍ර කර හැදූ මේ චිත්‍රපටය ගැන සමාගමේ විධාකයන් සතුව නම් කිසිම පැහැදීමක් තිබුනේ නැහැ.  මේ විකාර රූපි චිත්‍රපටය අනිවාර්යයෙන් අසාර්ථක වන බවට ඔවුන් තුළ ලොකු විශ්වාසයක් තිබුනා.  හැබැයි අවුලකට තිබුනේ මේ වන විටත් විශාල මුදලක් සමාගම විසින් මේ චිත්‍රපටයට වැය කිරීමයි. ඒ නිසා තම ආයෝජනය බේරා ගැනීමට සෙන්චරි ෆොක්ස් සමාගම කදිම උපක්‍රමයක් යෙදුවා. එනම් තමන්ගේ  වඩාත් ජනප්‍රිය  සිනමාහල් හිමියන් පුල පුලා බලා සිටින Other Side of Midnight චිත්‍රපටය ප්‍රදර්ශනය කරනවා නම් සීමිත දර්ශන වාර ගනනක අර  දඩබ්බර තරුණයා නිර්මාණය කරපු   අසාර්ථක වීමට නියමිත බී ග්‍රේඩ් විද්‍යා ප්‍රබන්ධ චිත්‍රපටයත් ප්‍රදර්ශනය කළ යුතු යැයි කොන්දේසියක් සිනමාහල් හිමියන්ට පැනවීම. Other Side of Midnight වලට කෑදරකමේ සිනමාහල් හිමියන් අකමැත්තෙන් මේ කොන්දේසියට එකඟ වුනා. 

ඔන්න දැන් ඔය කොන්දේසි පිට ට්වෙන්ටියත් සෙන්චරි ෆොක්ස් සමාගම 1977 මැයි වල චිත්‍රපට දෙකම රිලීස් කලා කියමුකෝ. Other Side of Midnight වගේ ජනප්‍රිය චිත්‍රපටයක් එක්ක තමන්ගේ නිර්මාණයත් එකට නිකුත් කරපු නිසා චිත්‍රපටය හදපු තරුණ සිනමාකරුවත් සියලු අපේක්ෂා අත්හැර දමල තම බිරිඳත් එක්ක හවායි දූපතේ සංචාරයකට ගියා. 
  ඔන්න  දැන් අර සීමිත ප්‍රදර්ශන වාර ගණනකට නියමිතව තිබුනු අසාර්ථක   බී ග්‍රේඩ් විද්‍යා ප්‍රබන්ධ චිත්‍රපටය බලන්න ගියපු ප්‍රේක්ෂකයෝ ඉස්සල්ලම සිනමා තිරයේ මෙහෙම දෙයක් දැක්කා 


ඉතින් කතාවට කියනව වගේ ඉතුරු ටික ඉතිහාසය තමයි. දැන් හිතාගන්න පුළුවනිනේ ඇයි Other Side of Midnight චිත්‍රපටය හැමෝටම අමතක කියලා නේද ? 

Saturday, June 17, 2017

බෞද්ධයන්ට වන අකටයුතුකම් ගැන සෙවීමට වියට්නාමයට ගිය ලාංකික දෙමළ ඇංග්ලිකානුවා Ceylonese Tamil Anglican who spoke for the Vietnamese Buddhists

සෑහෙන කලක් ප්‍රංශ යටත් විජිතයක් ව පැවති ඉන්දුචීනය නොහොත් වියට්නාමය නිදහස ලබන්නේ 1954 ඩියන් බියන් ෆූ සටනේදී ප්‍රංශ යටත් විජිත හමුදාවන් හෝ චිමිං ගේ අනුශාසකත්වයෙන් හා සෙන්පති ගියැප්ගේ නායකත්වය යටතේ වූ වියට්මිං නොහොත් වියට්නාම් ජාතිකවාදී හමුදාවන් අතින් දැවැන්ත පරාජයක් ලැබීමත් සමඟයි. 1954 ජිනීවා සම්මුතියෙන් රටේ උතුරු කොටස හෝ චි මිං යටතේ වාමාංශික ජාතිකවාදී රාජ්‍යයක් වෙද්දී දකුණු කොටස ඇමරිකානු හා ප්‍රංශ අනුග්‍රහය යටතේ බටහිරට හිතවත් දක්ශිනාංශික රාජ්‍යයක් බවට පත් වූවා. දකුණු වියට්නාමයේ නායකයා වූයේ දක්ශිනාංශිකයෙක් කමියුනිස්ට් විරෝධියෙක් මෙන්ම උග්‍ර කතෝලිකයෙක් වූ න්ගෝ ඩින් ඩියෙම්. 



වියට්නාම් ජනගහණනයෙන් අති බහුතරයක් - එනම් 70%ක් පමණම බෞද්ධයන්. එසේ වුවත්  ප්‍රංශ පාලන සමයේ වැඩි සැලකීමක් ලැබුනේ බෞද්ධයන්ට නොව පාලකයන්ගේ ආගම වූ කතෝලික දහම වැළඳගත් වියට්නාම් ජාතිකයන්ටයි. න්ගෝ ඩින් ඩියම් මේ පිළිවෙත් තවදුරටත් ඉදිරියට ගෙන ගියා. උතුරේ ජාතිකවාදී රජයෙන් දකුනේ ජනතාවටද බලපෑම් තිබූ නිසා සිය බලය පවත්වා ගැනීම සඳහා ඩියම් විශ්වාසය තැබුවේ කතෝලික ජනතාව  මතයි. එම නිසා රජයේ රැකියා, හමුදාවේ උසස් වීම් ආදිය සියල්ලට ආගම බලපෑවා - එනම් ඒවා ලැබුනේ කතෝලිකයන්ට පමණයි. මේ අසාධාරණ පිළිවෙත සඳහා ඩියම් ගේ සොහොයුරාගේ බිරිඳ වූ කතෝලික කාන්තාවක වූ මැඩම්   නු ද විශාල බලපෑමක් ඇති කළා. 

1963 පමණ වන විට තත්ත්වය තවත් දරුණු වුනා. එම වසරේ වෙසක් උත්සවය කට උඩ තිබියදී ආගමික කොඩි ප්‍රදර්ශනය කිරීම රජය විසින් තහනම් කරනු ලැබුවා. එහෙත් ඊට සතියකට පෙර පාප්වහන්සේගේ ධජය ප්‍රදර්ශනය සඳහා රාජ්‍ය අනුග්‍රහය ලැබුනා. කෙසේ වුවත් තහනම නොතකමින් බෞද්ධ ධජයන් ප්‍රදර්ශනය කිරීමට වියට්නාම් බෞද්ධ ජනතාව පෙළඹීමත් සමඟ උද්ගෝෂණ රැල්ලක් ඇතිවූවා. ඒවාට පොලීසිය වෙඩිතැබීම නිසා තත්ත්වය තවත් බැරෑරුම් වූවා. මේ අතර එම වසරේ ජූනි 11වන දින තික් ක්වාන් ඩුක් භික්ෂුව සිය සිරුරට ගිනි තබා ගනිමින් වියට්නාම් රජයේ මෙම පිළිවෙතට විරෝධය පළ කළා. ඇමරිකානු ඡායාරූප ශිල්පියෙකු නිසා මේ පිළිබඳව බාහිර ලෝකය දැන ගැනීමත් සමඟ විරෝධතා උග්‍ර වුනා. 


ජාත්‍යන්තර ක්ෂමා ආයතනය (Amnesty International) විසින් මේ සිදුවීම් පිළිබඳ වාර්තාවක් ලබා ගැනීම සඳහා තෝරාගන්නේ ලංකාවේ වෙසෙන තරුණ දෙමළ නීතිඥයෙක්. එවකට 31 වන වියේ පසුවන ඔහු ඇංග්ලිකන් කිතුණු පවුලකට අයත් වූවෙක් මෙන්ම රටේ ප්‍රධාන පෙළේ ඇංග්ලිකන් පාසලක් වන මහනුවර ත්‍රිත්ව විද්‍යාලයේ හා  බ්‍රිතාන්‍යයේ ඔක්ස්ෆර්ඩ් විශ්ව විද්‍යාලයේ අධ්‍යාපනය ලැබුවෙක්.  ක්ෂමා ආයතනය විසින් රටක් පිළිබඳව තැනූ පළමු වාර්තාව වන්නේද මෙයයි.  

ලේක් හවුස් පුවත්පත් සමාගමෙන් "විශේෂ වාර්තාකරුවෙක්" බව සහතික කරන ලිපියක්ද ඔහුට ලැබෙන්නේ කටයුතු වඩාත් පහසු කරගැනීමටයි. එහෙත් 1963 නොවැම්බර් මාසයේ මේ ගමනට ලක ලෑස්ති වෙමින් තිබියදී හමුදා කුමන්ත්‍රණයක් මඟින් න්ගෝ ඩින් ඩියම්ගේ පාලනය පෙරළෙනවා. එම පාලනය විසින් දේශපාලන හා ආගමික සිරකරුවන්ද නිදහස් කරන නිසා ක්ෂමා ආයතනයේ වාර්තාව එතරම්ම අදාළ නොවන තත්ත්වයක් මතු වනවා. නමුත් අපේ කතානායකයා එසේ වුනත් දකුණු වියට්නාමයට යාමට තීරණය කරනවා. 

එයට ප්‍රධානම හේතුව වන්නේ ඔහුගේම වචන වලින් කියන පරිදි  වියට්නාමයේ බෞද්ධයන් කතෝලික රජය විසින් මැඩපැවත්වීම ගැන රටේ විවිධ අන්තගාමී කොටස් මඟින් පතුරුවා හරින ප්‍රචාරකවාදී කටකතා නිසා ලාංකික සමාජයේද කිතුණු හා බෞද්ධ පුරවැසියන් අතර ඇතිවිය හැකි නොසන්සුන්තාව. මේ වන විට ලංකාව පාලනය කරන්නේ සිරිමාවෝ බණ්ඩාරනායක යටතේ එන් කියු දියස් වැනි අන්තවාදීන් මෙහෙයවන  සිංහල බෞද්ධ ජාතිකවාදී රජයක්. මෙවැනි සාධකද මේ ගමනට බලපාන්නට ඇති. සිංගප්පූරුවේ දකුණු වියට්නාම් කොන්සියුලර් කාර්යාලය මඟින් අවසර ලබාගන්නා ඔහු සයිගොන් නගරයට( වර්තමාන හෝ චි මිං නගරය) ගොඩ බසිනවා. 


දකුණු වියට්නාමයේ නව රජය බෞද්ධයන් වෙත තිබූ අකයුතුකම් වලට එරෙහිව ක්‍රියාමාර්ග ගැනීම නිසා ඒ වන විට රටේ තත්ත්වය තරමක් යහපත් අතට හැරී තිබුනා. පසුගිය රජය ගැන පරීක්ෂණයක් නිසා වියට්නාම් සමාජයේ විවිධ කොටස්වල සහායද ඔහු වෙත ලැබුනා. මේ කරුණු සම්පිණ්ඩනය කොට ඔහු තම වාර්තාව එළි දක්වන්නේ 1964 ජනවාරි මාසයේ. 

එම වාර්තාවට අනුව දකුණු වියට්නාමයේ බෞද්ධ ජනතාවට විරුද්ධ අකටයුතුකම්වලට ප්‍රධානම හේතුව කතෝලික ජනතාවගේ හෝ කතෝලික පල්ලියේ ක්‍රියාවලට වඩා තම බලය තහවුරු කරගැනීම හා තම පවුලේ අභිවෘද්ධිය උදෙසා න්ගෝ ඩින් ඩියම් ගේ ඒකාධිපති පාලනය නිසා ගන්නා ලද ක්‍රියාමාර්ග නිසා බව පැහැදිලිවම සඳහන් කරනවා. එමෙන්ම ඩියම් යථාර්තයෙන් බැහැර වීමට හේතුව ඔහුව රූකඩයක් මෙන් පාලනය කළ ඔහුගේ සොහොයුරා හා නෑනා බවද විශේෂයෙන් සඳහන් කරනවා. එමෙන්ම වෙසක් උත්සවය පැවැත්වීමට සිදුවූ බාධා නිසා ඇතිවූ උද්ඝෝෂණ හා වෙඩි තැබීම් ආදිය ගැන ද සවිස්තරාත්මක සාක්ෂි සහිතව සටහන් වනවා. 

කෙසේ වුවත් වාර්තාවේ අවසානයේ ඔහු වැදගත් කරුණක් සඳහන් කරනවා. එනම්  වියට්නාම් බෞද්ධයන්ට මෙතරම් අකටුයුතුකම් සිදුවුවත් එවකට ලංකාවේ සිංහල බෞද්ධ අන්තවාදීන් තම දේශපාලනික උවමනාවන් සඳහා මවා පෙන්වන පරිදි වියට්නාම් කතෝලිකයන් හා බෞද්ධයන් අතර යුද්ධයක් වැනි තත්ත්වයක් නොමැති බවත් එම ආගමිකයන්  දෙපිරිස අතර කිසිදු වෛරයක් නොදුටු බවත් සඳහන් කරනවා. එමෙන්ම  වියට්නාම් බෞද්ධ නායකයන්ද  පවසන්නේ එම දුෂ්කර සමයේ  සාමාන්‍ය කතෝලික ජනතාව විසින් තමන් වෙත දැක්වූ සහාය අගය කරන බවත් කතෝලික ජනතාව සමඟ තමන්ගේ කිසිදු ප්‍රශ්නයක් නොමැති බවත්. 

මෙලෙස ක්ෂමා ආයතනය වෙනුවෙන් දකුණු වියට්නාම් බෞද්ධයන් ගැන සොයා බැලීමට ගිය තරුණ දෙමළ නීතිවේදියා නම් පසු කලක ලංකාවේ කීර්තිමත්ම විදේශ ඇමතිවරයා බවට හා බෙදුම්වාදයට එරෙහි සටනේ සංකේතයක් බවටද පත්වූ ලක්ෂ්මන් කදිරගාමර් මහතා යි. ඒ මහතා ඉදිරිපත් කළ සම්පූර්ණ වාර්තාව මෙතනින් 
http://www.sundaytimes.lk/060813/news/nwsp13.0.html